នារសៀលថ្ងៃច័ន្ទ ១ រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០១ ខែមិថុនា ឆ្នាំ២០២៦ សាកលវិទ្យាល័យការពារជាតិមានកិត្តិយសបានរៀបចំកម្មវិធីបាឋកថា ក្រោមប្រធានបទ "បរិបទទូទៅនៃបញ្ញាសិប្បនិម្មិត (AI)" ក្រោមអធិបតីភាព ដ៏ខ្ពង់ខ្ពស់ ឯកឧត្តមសាស្រ្តាចារ្យបណ្ឌិត ឆែម គាតរិទ្ធី ទេសរដ្ឋមន្រ្តី និងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។ បាឋកថានេះមានសារៈសំខាន់ជាយុទ្ធសាស្រ្តសម្រាប់ថ្នាក់ដឹកនាំ បុគ្គលិក យោធាចារ្យ និងសិក្ខាកាមនៃសាកលវិទ្យាល័យការពារជាតិ ក្នុងការស្វែងយល់អំពីឱកាស បញ្ហាប្រឈម និងផលប៉ះពាល់នៃបញ្ញាសិប្បនិម្មិត (AI) និងបច្ចេកវិទ្យាថ្មីៗ ចំពោះបរិបទសន្តិសុខ និងការពារជាតិ។ ទន្ទឹមនឹងនេះ ក៏បានរួមចំណែកពង្រឹងសមត្ថភាពធនធានមនុស្សក្នុងការត្រៀមខ្លួនឆ្លើយតបទៅនឹងការប្រែប្រួលយ៉ាងឆាប់រហ័សនៃបរិយាកាសបច្ចេកវិទ្យាសកល សំដៅលើកកម្ពស់ប្រសិទ្ធភាពការងារ ការអប់រំ ការស្រាវជ្រាវ និងការអភិវឌ្ឍស្ថាប័នឱ្យកាន់តែទំនើប និងសមស្របតាមតម្រូវការនៃសម័យកាលថ្មី។