នារសៀលថ្ងៃអង្គារ ១៥ រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៤ ខែកក្កដា ឆ្នាំ២០២៦ ឯកឧត្តម ឧត្តមសេនីយ៍ឯក ដោក សុផា សាកលវិទ្យាធិការនៃសាកលវិទ្យាល័យការពារជាតិ បានទទួលជួបសម្តែងការគួរសម និងពិភាក្សាការងារជាមួយលោកវរសេនីយ៍ត្រី Stuart Patterson មន្ត្រីទទួលបន្ទុកកិច្ចសហប្រតិបត្តិការផ្នែកអប់រំការពារជាតិអូស្រ្តាលី ប្រចាំប្រទេសកម្ពុជា។ ជំនួបនេះមានគោលបំណងពិនិត្យវឌ្ឍនភាពនៃកិច្ចសហប្រតិបត្តិការលើវិស័យអប់រំយោធារវាងភាគីទាំងពីរកន្លងមក ព្រមទាំងពិភាក្សាអំពីគំនិតផ្តើមថ្មីៗ និងផែនការសហប្រតិបត្តិការនានា ដែលគ្រោងនឹងអនុវត្តនាពេលខាងមុខ ដើម្បីបន្តពង្រឹង និងពង្រីកទំនាក់ទំនងកិច្ចសហប្រតិបត្តិការរវាងសាកលវិទ្យាល័យការពារជាតិ និងភាគីអូស្រ្តាលី។

នារសៀលថ្ងៃចន្ទ ១៤ រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៣ ខែកក្កដា ឆ្នាំ២០២៦ ឯកឧត្តម ឧត្តមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិ បានទទួលជួបសម្តែងការគួរសម និងពិភាក្សាការងារជាមួយលោកវរសេនីយ៍ទោ អូលីវីយេ ឡឺហ្គ្រង់ ប្រធានបេសកកម្មសហប្រតិបត្តិការការពារជាតិបារាំងប្រចាំព្រះរាជាណាចក្រកម្ពុជា។ ជំនួបនេះមានគោលបំណងពិនិត្យវឌ្ឍនភាពនៃកិច្ចសហប្រតិបត្តិការលើវិស័យអប់រំយោធានាពេលកន្លងមក ព្រមទាំងពិភាក្សាអំពីគំនិតផ្តួចផ្តើម និងផែនការសហប្រតិបត្តិការនានា ដែលគ្រោងនឹងអនុវត្តនាពេលដ៏ខ្លីខាងមុខ ដើម្បីបន្តពង្រឹង និងពង្រីកទំនាក់ទំនងកិច្ចសហប្រតិបត្តិការរវាងសាកលវិទ្យាល័យការពារជាតិ និងភាគីបារាំង។

នាព្រឹកថ្ងៃសុក្រ ១១ រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១០ ខែកក្កដា ឆ្នាំ២០២៦ សាកលវិទ្យាល័យការពារជាតិ មានកិត្តិយសបានរៀបចំបាឋកថាសាធារណៈក្រោមប្រធានបទ «គំនិតផ្តួចផ្តើមសន្តិសុខសកល និងចំណងមិត្តភាពកម្ពុជា–ចិន» ដោយឯកឧត្តម WANG Wenbin ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។ បាឋកថានេះបានឆ្លុះបញ្ចាំងអំពីទស្សនវិស័យស្តីពីបរិបទសន្តិសុខសកល ការលើកកម្ពស់កិច្ចសហប្រតិបត្តិការអន្តរជាតិ និងការពង្រឹងចំណងមិត្តភាពដែកថែប ព្រមទាំងភាពជាដៃគូយុទ្ធសាស្ត្រគ្រប់ជ្រុងជ្រោយរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ស្របតាមទិសដៅនយោបាយការបរទេស និងកិច្ចសហប្រតិបត្តិការលើវិស័យការពារជាតិរវាងប្រទេសទាំងពីរ។ ជាមួយគ្នានេះ បាឋកថាបានគូសបញ្ជាក់អំពីសារៈសំខាន់នៃ «គំនិតផ្តួចផ្តើមសន្តិសុខសកល» (Global Security Initiative - GSI) ដែលលោកប្រធានាធិបតី ស៊ី ជីនពីង បានដាក់ចេញកាលពីខែមេសា ឆ្នាំ២០២២ ក្នុងគោលបំណងលើកកម្ពស់គោលការណ៍សន្តិសុខរួម សន្តិសុខគ្រប់ជ្រុងជ្រោយ សន្តិសុខសហប្រតិបត្តិការ និងសន្តិសុខប្រកបដោយចីរភាព តាមរយៈការគោរពអធិបតេយ្យភាព បូរណភាពទឹកដី ផលប្រយោជន៍ស្នូលរបស់ប្រទេសនីមួយៗ និងការដោះស្រាយជម្លោះដោយសន្តិវិធី តាមរយៈកិច្ចសន្ទនា និងពហុភាគីនិយម។ គំនិតផ្តួចផ្តើមនេះ ត្រូវបានលើកឡើងថា អាចរួមចំណែកដល់ការថែរក្សាសន្តិភាព ស្ថិរភាព និងសន្តិសុខនៅក្នុងតំបន់អាស៊ីអាគ្នេយ៍ ស្របពេលដែលតំបន់កំពុងប្រឈមនឹងបញ្ហាប្រឈមផ្នែកភូមិសាស្ត្រនយោបាយ និងបញ្ហាសន្តិសុខមិនមែនប្រពៃណីកាន់តែស្មុគស្មាញ។ សម្រាប់ប្រទេសកំពុងអភិវឌ្ឍដូចជាកម្ពុជា គំនិតផ្តួចផ្តើមនេះក៏ត្រូវបានចាត់ទុកថា ជាក្របខណ្ឌមួយសម្រាប់ពង្រឹងបរិយាកាសសន្តិភាព និងស្ថិរភាព ដែលជាមូលដ្ឋានគ្រឹះសម្រាប់ការអភិវឌ្ឍសេដ្ឋកិច្ច សង្គម ការកសាងសមត្ថភាពស្ថាប័ន និងការពង្រីកកិច្ចសហប្រតិបត្តិការអន្តរជាតិ ដើម្បីឆ្លើយតបនឹងបញ្ហាប្រឈមរួមប្រកបដោយប្រសិទ្ធភាព។ ទន្ទឹមនឹងនេះ បាឋកថាក៏បានផ្តល់នូវទស្សនៈ និងចំណេះដឹងដ៏មានតម្លៃដល់ថ្នាក់ដឹកនាំ នាយទាហាន យោធាចារ្យ និងសិក្ខាកាមរបស់សាកលវិទ្យាល័យការពារជាតិ អំពីនិន្នាការវិវត្តនៃបរិយាកាសសន្តិសុខក្នុងតំបន់ និងសកល ព្រមទាំងទិសដៅនៃកិច្ចសហប្រតិបត្តិការកម្ពុជា–ចិននាពេលអនាគត ដែលនឹងបន្តរួមចំណែកដល់ការពង្រឹងសន្តិភាព ស្ថិរភាព ការអភិវឌ្ឍប្រកបដោយចីរភាព និងវិបុលភាពរួមរវាងប្រទេសទាំងពីរ។

នារសៀលថ្ងៃចន្ទ ១៥ កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៩ ខែមិថុនា ឆ្នាំ២០២៦ ដើម្បីឆ្លើយតបនឹងតម្រូវការក្នុងការអភិវឌ្ឍធនធានមនុស្សលើវិស័យការងារធានា និងចិញ្ចឹមទ័ព ឱ្យកាន់តែមានប្រសិទ្ធភាព ស្របតាមទិសដៅយុទ្ធសាស្ត្រ និងសម្រេចបាននូវលទ្ធផលជាក់ស្តែង សាកលវិទ្យាល័យការពារជាតិ បានសហការជាមួយវិទ្យាស្ថានជាតិកសិកម្មព្រែកលៀប នៃក្រសួងកសិកម្ម រុក្ខាប្រមាញ់ និងនេសាទ បើកវគ្គបណ្តុះបណ្តាលរយៈពេលខ្លី ស្តីពី «បច្ចេកទេសដាំដុះបន្លែ ផ្លែឈើ និងការចិញ្ចឹមសត្វ» នៅវិទ្យាស្ថានជាតិកសិកម្មព្រែកលៀប។ វគ្គបណ្តុះបណ្តាលនេះ មានគោលបំណងពង្រឹងចំណេះដឹងទ្រឹស្តី និងផ្តល់ជំនាញអនុវត្តជាក់ស្តែងលើបច្ចេកទេសដាំដុះបន្លែ ផ្លែឈើ និងការចិញ្ចឹមសត្វ ដើម្បីគាំទ្រដល់ការងារធានា និងចិញ្ចឹមទ័ព ព្រមទាំងលើកកម្ពស់សមត្ថភាពនិស្សិតនៃមហាវិទ្យាល័យភស្តុភារ និងហិរញ្ញវត្ថុយោធា ឱ្យអាចយកចំណេះដឹង និងជំនាញដែលទទួលបានទៅអនុវត្តប្រកបដោយប្រសិទ្ធភាពនៅតាមបណ្តាអង្គភាពនានា បន្ទាប់ពីបញ្ចប់ការសិក្សា ដើម្បីរួមចំណែកពង្រឹងការងារធានា និងចិញ្ចឹមទ័ព ឱ្យកាន់តែមានប្រសិទ្ធភាព និរន្តរភាព និងឆ្លើយតបបានកាន់តែល្អប្រសើរចំពោះតម្រូវការជាក់ស្តែងរបស់កងយោធពលខេមរភូមិន្ទ។

នាព្រឹកថ្ងៃច័ន្ទ ១៥ កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៩ ខែមិថុនា ឆ្នាំ២០២៦ ឯកឧត្តម ឧត្តមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិ បានដឹកនាំគណៈប្រតិភូសាកលវិទ្យាល័យការពារជាតិ អញ្ជើញបំពេញទស្សនកិច្ចសិក្សា និងពិភាក្សាការងារនៅវិទ្យាស្ថានជាតិបណ្តុះបណ្តាលបច្ចេកទេស (NTTI) ក្នុងគោលបំណងស្វែងរកកាលានុវត្តភាព និងពង្រឹងកិច្ចសហប្រតិបត្តិការរវាងស្ថាប័នទាំងពីរ លើការបណ្តុះបណ្តាលជំនាញបច្ចេកទេស និងវិជ្ជាជីវៈ ដើម្បីលើកកម្ពស់សមត្ថភាពយោធិនជាបុគ្គលិក និងសិក្ខាកាម នៃសាកលវិទ្យាល័យការពារជាតិ ឱ្យឆ្លើយតបកាន់តែប្រសើរទៅនឹងតម្រូវការនៃការអភិវឌ្ឍធនធានមនុស្ស និងការបំពេញភារកិច្ចជូនជាតិ។

នារសៀលថ្ងៃព្រហស្បតិ៍ ១១ កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែមិថុនា ឆ្នាំ២០២៦ ឧត្ដមសេនីយ៍ឯក ឡុង គឹមហេង សាកលវិទ្យាធិការរង (ប្រចាំបញ្ជា) តំណាងដ៏ខ្ពង់ខ្ពស់ ឯកឧត្ដម ឧត្តមសេនីយ៍ឯក ដោក សុផា សាកលវិទ្យាធិការសាកលវិទ្យាល័យការពារជាតិ បានទទួលជំនួបសម្ដែងសម្តែងការគួរសម និងពិភាក្សាការងារជាមួយប្រតិភូមហាវិទ្យាល័យភូមិន្ទយោធានៃបណ្ឌិត្យសភាយោធាកាណាដាដឹកនាំដោយ លោក វរសេនីយ៍ទោ PAUL PAYNE នាយការិយាល័យ អនុពន្ធ័យោធាកាណាដា ប្រចាំព្រះរាជាណាចក្រកម្ពុជា។ គួរកត់សម្គាល់ថា ក្រោមការដឹកនាំដ៏ឈ្លាសវៃរបស់ ឯកឧត្តម ឧត្តមសេនីយ៍ឯក ដោក សុផា ក្នុងនាមជាសាកលវិទ្យាធិការ សាកលវិទ្យាល័យការពារជាតិបានស្វាគមន៍ និងជំរុញយ៉ាងសកម្មនូវការពង្រឹង និងពង្រីកកិច្ចសហប្រតិបត្តិការទ្វេភាគីជាមួយបណ្ឌិត្យសភាយោធាកាណាដា។ ជាក់ស្ដែង កាលពីថ្ងៃទី១៨ ដល់ថ្ងៃទី២២ ខែវិច្ឆិកា ឆ្នាំ២០២៥ សាកលវិទ្យាល័យការពារជាតិ ក្នុងនាមជាម្ចាស់ផ្ទះ និងសហប្រធានរួមជាមួយបណ្ឌិត្យសភាយោធាកាណាដា បានរៀបចំកិច្ចប្រជុំថ្នាក់ដឹកនាំសាកលវិទ្យាល័យ មហាវិទ្យាល័យ និងវិទ្យាស្ថានការពារជាតិ នៃវេទិកាតំបន់អាស៊ាន (ARF-HDUCIM) ប្រកបដោយជោគជ័យ និងទទួលបានលទ្ធផលផ្លែផ្កាយ៉ាងល្អប្រសើរ ដែលជាព្រឹត្តិការណ៍មានលក្ខណៈប្រវត្តិសាស្ត្រមួយសម្រាប់សាកលវិទ្យាល័យការពារជាតិ។ បន្ទាប់មក នៅខែធ្នូ ឆ្នាំ២០២៥ ស្ថាប័នទាំងពីរបានសហការរៀបចំវគ្គសិក្សាកម្រិតមធ្យមស្ដីពីច្បាប់នៃជម្លោះប្រដាប់អាវុធ (Law of Armed Conflict) ដោយទទួលបានជោគជ័យផងដែរ។

អនុវត្តយ៉ាងម៉ឺងម៉ាត់តាមគោលការណ៍របស់ក្រសួងការពារជាតិ សាកលវិទ្យាល័យការពារជាតិ បាននិងកំពុងសហការជាមួយនាយកដ្ឋានបុគ្គលិក ក្រសួងការពារជាតិ ដើម្បីដំណើរការត្រួតពិនិត្យទ័ព-កូន ចំពោះថ្នាក់ដឹកនាំ យោធាចារ្យ បុគ្គលិកអប់រំ និស្សិត និងសិក្ខាកាមទាំងអស់ ដែលស្ថិតក្រោមចំណុះសាកលវិទ្យាល័យការពារជាតិ ចាប់ពីថ្ងៃទី១៦ ខែមិថុនា ឆ្នាំ២០២៦ នេះតទៅ។

ក្រោមការយកចិត្តទុកដាក់ និងការគាំទ្រដ៏ខ្ពង់ខ្ពស់ពីសំណាក់ ឯកឧត្តម ឧត្តមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិ នាថ្ងៃសុក្រ ទី១១ ខែមិថុនា ឆ្នាំ២០២៦ ឯកឧត្តម ឧត្តមសេនីយ៍ទោ ស៊ន សម្បត្តិ សាកលវិទ្យាធិការរង បានដឹកនាំក្រុមកីឡាបាល់បោះសាកលវិទ្យាល័យការពារជាតិ ចូលរួមប្រកួតកីឡាបាល់បោះឧត្តមសិក្សា និងមធ្យមសិក្សាបច្ចេកទេសថ្នាក់ជាតិ ប្រចាំឆ្នាំ២០២៦ ក្រោមប្រធានបទ «កីឡាដើម្បីអប់រំ»។ ជាលទ្ធផល ក្រុមកីឡាបាល់បោះសាកលវិទ្យាល័យការពារជាតិ បានបង្ហាញនូវសមត្ថភាព បច្ចេកទេស ស្មារតីសាមគ្គីភាព និងការប្រកួតប្រជែងប្រកបដោយវិជ្ជាជីវៈ រហូតដណ្តើមបានជ័យលាភីចំណាត់ថ្នាក់លេខ១ និងគ្រងពានរង្វាន់ប្រចាំឆ្នាំ២០២៦ ដោយជោគជ័យ។ សមិទ្ធផលដ៏ត្រចះត្រចង់នេះ មិនត្រឹមតែឆ្លុះបញ្ចាំងពីសក្តានុពល និងគុណភាពរបស់និស្សិតសាកលវិទ្យាល័យការពារជាតិប៉ុណ្ណោះទេ ប៉ុន្តែថែមទាំងបង្ហាញពីការយកចិត្តទុកដាក់ក្នុងការអភិវឌ្ឍធនធានមនុស្សទាំងផ្នែកចំណេះដឹង វិន័យ និងកាយសម្បទា ស្របតាមទិសដៅអប់រំរបស់សាកលវិទ្យាល័យ។ ជ័យជម្នះនេះ គឺជាមោទនភាពដ៏ធំធេងរបស់សាកលវិទ្យាល័យការពារជាតិ និងជាកម្លាំងចិត្តសម្រាប់បន្តសម្រេចសមិទ្ធផលថ្មីៗបន្ថែមទៀតនាពេលអនាគត។

នាថ្ងៃសៅរ៍ ៦ រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០៦ ខែមិថុនា ឆ្នាំ២០២៦ ឯកឧត្តម ឧត្តមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំមានជ័យ បានបន្តដឹកនាំក្រុមគ្រូពេទ្យស្ម័គ្រចិត្តសាកលវិទ្យាល័យការពារជាតិ ចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃក្នុងមូលដ្ឋាន ឃុំមានជ័យ ស្រុកប្រាសាទបាគង ខេត្តសៀមរាប។

នារសៀលថ្ងៃច័ន្ទ ១ រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី០១ ខែមិថុនា ឆ្នាំ២០២៦ សាកលវិទ្យាល័យការពារជាតិមានកិត្តិយសបានរៀបចំកម្មវិធីបាឋកថា ក្រោមប្រធានបទ "បរិបទទូទៅនៃបញ្ញាសិប្បនិម្មិត (AI)" ក្រោមអធិបតីភាព ដ៏ខ្ពង់ខ្ពស់ ឯកឧត្តមសាស្រ្តាចារ្យបណ្ឌិត ឆែម គាតរិទ្ធី ទេសរដ្ឋមន្រ្តី និងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌។ បាឋកថានេះមានសារៈសំខាន់ជាយុទ្ធសាស្រ្តសម្រាប់ថ្នាក់ដឹកនាំ បុគ្គលិក យោធាចារ្យ និងសិក្ខាកាមនៃសាកលវិទ្យាល័យការពារជាតិ ក្នុងការស្វែងយល់អំពីឱកាស បញ្ហាប្រឈម និងផលប៉ះពាល់នៃបញ្ញាសិប្បនិម្មិត (AI) និងបច្ចេកវិទ្យាថ្មីៗ ចំពោះបរិបទសន្តិសុខ និងការពារជាតិ។ ទន្ទឹមនឹងនេះ ក៏បានរួមចំណែកពង្រឹងសមត្ថភាពធនធានមនុស្សក្នុងការត្រៀមខ្លួនឆ្លើយតបទៅនឹងការប្រែប្រួលយ៉ាងឆាប់រហ័សនៃបរិយាកាសបច្ចេកវិទ្យាសកល សំដៅលើកកម្ពស់ប្រសិទ្ធភាពការងារ ការអប់រំ ការស្រាវជ្រាវ និងការអភិវឌ្ឍស្ថាប័នឱ្យកាន់តែទំនើប និងសមស្របតាមតម្រូវការនៃសម័យកាលថ្មី។

នាព្រឹកថ្ងៃអង្គារ ១០ កើត ខែជេដ្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦ ឯកឧត្ដម ឧត្ដមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិបានអញ្ជើញចូលរួមពិធីមិទ្ទិញអបអរសាទរខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ឧសភា ២០២៦ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកោះកុង។